ਰਾਜਸਥਾਨ ਦੀ ਪ੍ਰੀਖਿਆਵਾਂ ਚ ਸਿੱਖ ਉਮੀਦਵਾਰਾਂ ਨੂੰ ਆਪਣੇ ਧਾਰਮਿਕ ਪ੍ਰਤੀਕਾਂ ਨੂੰ ਧਾਰਨ ਕਰਨ ਦੀ ਇਜਾਜ਼ਤ ਦੇਣ 'ਤੇ ਭਾਜਪਾ ਪੰਜਾਬ ਨੇ ਕੀਤਾ ਧੰਨਵਾਦ
ਚੰਡੀਗੜ੍ਹ, 30 ਜੁਲਾਈ ” ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਪੰਜਾਬ ਨੇ ਰਾਜਸਥਾਨ ਸਰਕਾਰ ਦਾ ਤਹਿ ਦਿਲੋਂ ਧੰਨਵਾਦ ਕੀਤਾ ਹੈ, ਜਿਸ ਨੇ ਸਿੱਖ ਉਮੀਦਵਾਰਾਂ ਨੂੰ ਰਾਜ ਵਿੱਚ ਹੋਣ ਵਾਲੀਆਂ ਸਭ ਪ੍ਰਤੀਯੋਗੀ ਪ੍ਰੀਖਿਆਵਾਂ ਵਿੱਚ ਆਪਣੇ ਸਾਰੇ ਧਾਰਮਿਕ ਪ੍ਰਤੀਕ — ਜਿਵੇਂ ਕਿ ਕਿਰਪਾਨ, ਕੜਾ ਅਤੇ ਪੱਗ (ਦਸਤਾਰ) — ਪਾ ਕੇ ਪ੍ਰੀਖਿਆ ਦੇਣ ਦੀ ਇਜਾਜ਼ਤ ਵਾਲੀ ਅਧਿਕਾਰਿਕ ਨੋਟੀਫਿਕੇਸ਼ਨ ਮੁੜ ਜਾਰੀ ਕੀਤੀ ਹੈ।
ਇਹ ਹੁਕਮ, ਜੋ ਪਹਿਲੀ ਵਾਰੀ ਦਸੰਬਰ 2019 ਵਿੱਚ ਜਾਰੀ ਹੋਇਆ ਸੀ, ਹੁਣ 29 ਜੁਲਾਈ 2025 ਨੂੰ ਰਾਜਸਥਾਨ ਦੇ ਗ੍ਰਹਿ ਵਿਭਾਗ ਵੱਲੋਂ ਦੁਬਾਰਾ ਜਾਰੀ ਕੀਤਾ ਗਿਆ ਹੈ। ਇਸ ਵਿੱਚ ਪੁਲਿਸ, ਸਿੱਖਿਆ ਵਿਭਾਗ ਅਤੇ ਭਰਤੀ ਬੋਰਡ ਸਮੇਤ ਸਾਰੇ ਵਿਭਾਗਾਂ ਨੂੰ ਹੁਕਮ ਦਿੱਤਾ ਗਿਆ ਹੈ ਕਿ ਸਿੱਖ ਉਮੀਦਵਾਰਾਂ ਨੂੰ ਉਨ੍ਹਾਂ ਦੇ ਧਾਰਮਿਕ ਪ੍ਰਤੀਕ ਪਾਹੁਣ ਤੋਂ ਨਾ ਰੋਕਿਆ ਜਾਵੇ।
ਭਾਜਪਾ ਪੰਜਾਬ ਦੇ ਮੀਤ ਪ੍ਰਧਾਨ ਬਿਕਰਮਜੀਤ ਸਿੰਘ ਚੀਮਾ ਨੇ ਕਿਹਾ, “ਇਹ ਫੈਸਲਾ ਸਿਰਫ਼ ਪ੍ਰਸ਼ਾਸਕੀ ਸਪਸ਼ਟਤਾ ਨਹੀਂ, ਬਲਕਿ ਭਾਰਤ ਦੀ ਧਾਰਮਿਕ ਆਜ਼ਾਦੀ ਅਤੇ ਵਿਭਿੰਨਤਾ ਦੇ ਆਦਰ ਦਾ ਇਕ ਚਮਕਦਾ ਹੋਇਆ ਉਦਾਹਰਨ ਹੈ। ਇਹ ਭਾਜਪਾ ਦੀ ਸਾਰਿਆਂ ਧਰਮਾਂ ਪ੍ਰਤੀ ਆਦਰ ਅਤੇ ਹਰ ਨਾਗਰਿਕ ਦੇ ਸੰਵਿਧਾਨਕ ਅਧਿਕਾਰਾਂ ਦੀ ਰੱਖਿਆ ਕਰਨ ਦੀ ਲਗਾਤਾਰ ਨੀਤੀ ਨੂੰ ਦਰਸਾਉਂਦਾ ਹੈ।”
ਭਾਜਪਾ ਪੰਜਾਬ ਅਤੇ ਸਾਰੇ ਸਿੱਖ ਭਾਈਚਾਰੇ ਵੱਲੋਂ, ਮੈਂ ਰਾਜਸਥਾਨ ਸਰਕਾਰ ਅਤੇ ਭਾਜਪਾ ਨੇਤ੍ਰਤਵ ਦਾ ਦਿਲੋਂ ਧੰਨਵਾਦ ਕਰਦਾ ਹਾਂ ਕਿ ਉਨ੍ਹਾਂ ਨੇ ਸਿੱਖ ਧਰਮ ਅਤੇ ਉਸ ਦੀਆਂ ਪਰੰਪਰਾਵਾਂ ਨੂੰ ਸਰਕਾਰੀ ਪ੍ਰਕਿਰਿਆ ਵਿੱਚ ਪੂਰਾ ਆਦਰ ਦਿੱਤਾ।
ਭਾਜਪਾ ਪੰਜਾਬ ‘ਸਰਵ ਧਰਮ ਸਮਭਾਵ’ ਦੀ ਭਾਵਨਾ ਨਾਲ ਅੱਗੇ ਵੀ ਸਾਰੇ ਭਾਈਚਾਰਿਆਂ ਦੇ ਆਦਰ ਅਤੇ ਅਧਿਕਾਰਾਂ ਦੀ ਰੱਖਿਆ ਲਈ ਵਚਨਬੱਧ ਰਹੇਗੀ।
